Guoddelis åvddånibme doaresfágalasj tiebmán skåvlån galggá vaddet oahppijda dádjadusav vuodulasj juores ja åvddånimvuoges sebrudagán, ja gåktu dajt dåmadit. Guoddelis åvddånimen le gatjálvis iellemav ednamin suodjalit ja udnásj almatjij darbojt huksat, váni biejstek boahtte buolvaj máhttelisvuodajt ietjasa dárbojt huksat. Guoddelis åvddånimen le dádjadus aktijvuodas soasiála, ruhtalasj ja birásguoskavasj dilijs. Almatjij viessomvuoges ja resurssaanos badjáni vájkkudusá bájkálattjat, guovlo ja globála hárráj.
Gå barggi tiemáj galggi oahppe åvddånahttet máhtudagáv vaj máhtti åvdåsvasstediddje válljimijt válldet ja dåmadit etihkalattjat ja birásdiedulattjat. Oahppe galggi dádjadit ájnegattjat dåmadime ja válljima li ávkálattja. Tiemájn li tjuolma tjanádum birrasij ja dálkádahkaj, hedjovuohtaj ja resursaj juogadibmáj, rijdojda, varresvuohtaj, dássásasjvuohtaj, demografijjaj ja åhpadussaj. Oahppe galggi oahppat aktijvuodav duot dát aspektajs guoddelis åvddånimen.
Teknologijjan le ájnas vájkkudus ulmutjijda, birrasij ja sebrudahkaj. Teknologijja máhtudahka ja diehto aktijvuodaj gaskan teknologijja ja sosiála, ruhtalasj ja birrasa bielijt guoddelis åvddånimen le guovdátjin dán tiemán. Teknologijjaåvddånibme máhttá tjoavddet gássjelisvuodajt, valla máhttá aj buktet ådå. Máhtto teknologijja hárráj buktá dádjadusáv makkir juore ma máhtti badjánit teknologijja anedijn, ja gåktu dajt máhttá giehtadallat.