Demokratiija ja mielborgárvuohta fáddán skuvllas galgá addit ohppiide máhtu demokratiija eavttuid, árvvuid ja njuolggadusaid birra, ja dahkat nu ahte sii sáhttet oassálastit demokráhtalaš proseassain. Oahpahus galgá addit ipmárdusa demokratiija ja guovddáš olmmošvuoigatvuođaid oktavuođain, nu go cealkinfriddjavuohta, jienastanvuoigatvuohta ja organisašunfriddjavuohta. Sii galget oažžut ipmárdusa das ahte demokratiijas leat iešguđet hámit ja albmaneamit.
Go barget fáttáin demokratiija ja mielborgárvuohta, de galget oahppit ipmirdit oktavuođa indiviidda vuoigatvuođaid ja geatnegasvuođaid gaskkas. Indiviiddain lea vuoigatvuohta oassálastit politihkalaš bargguin, seammás go servodat lea sorjavaš das ahte álbmot geavaha vuoigatvuođaid oassálastit politihkalaš barggus ja hábmet siviila servodaga. Skuvla galgá arvvosmahttit ohppiid šaddat aktiivvalaš mielborgárin, ja addit sidjiide gealbbu oassálastit demokratiija viidáset ovdánahttimis Norggas.
Oahpahus galgá addit ohppiide máhtu ja gálggaid dustet hástalusaid demokráhtalaš prinsihpaid mielde. Sii galget ipmirdit dilemmaid mat leat das ahte dohkkehit sihke eanetlogu rievtti ja unnitlogu vuoigatvuođaid. Sii galget hárjehallat dáiddu jurddašit kritihkalaččat, oahppat dustet oaivilvuostelasvuođaid ja áktet guovtteoaivilvuođa.
Barggu bokte fáttáin galget oahppit oahppat manne demokratiija ii sáhte atnit diehttelassan, ja ahte dan ferte ovdánahttit ja bajásdoallat.